Erdwurm Boerdery Tuis – ‘n eenvoudige opsomming

Wurm boerdery is regtig een van die maklikste dinge om van die grond af te kry.  Indien jy dit op klein skaal aanpak, let op die volgende feite:

 

• - Jy sien nie resultate binne 2 weke nie!
• - Jy gaan nie geld maak hieruit as jy dit op klein skaal doen nie. Dus is dit ‘n stokperdjie. Tensy jy baie spasie het om hierdie in ‘n volskaalse boerdery te omskep.
• - Hierdie erdwurms is NIE die ou vales wat in ons tuine is nie – dit is rooi wurms wat vinniger werk om voedsel af te breek en grond ‘gesond’ te maak. Moenie jou tuin erdwurms gaan vang en op hok sit nie – hulle sal dit nie maak nie!

 

Om ‘tuisterapie’ gratis te kry, begin jou wurmboerdery as volg:

 

• - Koop 2 bins. Dit moet swart wees. Plastiek bins met deksels is te kry by hardeware winkels, plastiek winkels, of Game en Pick ‘n Pay.

 

• - Wormeries adverteer bins en wurms, wat wonderlik is as jy nie ‘n vaardige persoon is nie. Dan kan jy die ekstra geld betaal, en die volledige sisteem kry.

 

• - In een bin boor jy die kleinste gaatjies wat jy kan – al op die bodem langs. Pas jy die twee bins in mekaar, en daar waar die boonste bin ‘n gedeelte het wat nie toegemaak word deur die onderste bin nie, boor jy gaatjies vir lugbeweging deur jou wurm vesting.

 

• - Sit twee velle koerantpapier op die bodem van jou wurm bin. Die onderste bin is om eventueel die ‘wurm tee’ in op te vang. Ook wurms wat ‘ontsnap’, beland gewoonlik in die onderste bin, en kan dan weekliks gered, en teruggegooi word.

 

• - As jy ‘n papershredder tot jou beskikking het, shred koerantpapier. Anders moet jy dit in lang, dun repe opskeur. Hoe dunner die repe, hoe gouer werk die wurms hulle weg daardeur.

 

• - Week die koerante in water, druk die water uit, maak die koerant bollings los van mekaar, en gooi in die bin. Maak die bin so byna ‘n kwart vol koerant skeursels.

 

• - Neem ‘n paar hande klam grond, en sprinkel dit bo-oor die koerantpapier.

 

• - Wurms is gek oor teesakkies. Koffie moer vind ek persoonlik te sterk, daarom hou ek by teesakkies. Rooibostee se blare en stokkies maak heerlike speelplek. Hou die sakkies na elke tee sessie eenkant, en as jy ‘n handvol het, spoel dit onder die kraan uit (verwyder enige melk wat saamgekom het uit die koppie) en begrawe dit so effe in die koerant laag. Die wurms baljaar daar, en jy sal sommer eiers ook vind na ‘n tyd.

 

• - Bins moenie in direkte sonlig staan nie – die wurms is nie saunas gewoond nie. My een bin staan binne die huis, sonder ‘n reuk van ‘n soort!

 

• - PASOP vir kos. Die beste is om groentes in die mikrogolf gaar te maak, en dit heeltemal te laat afkoel voor jy dit in die middel van jou bin begrawe. Ek gee my wurms tans so een maal in twee tot drie weke ‘n lekker butternut wat in skywe gesny is, en deur die mikro gaargestoom is. Te veel kos in die somer veroorsaak ‘n gistingsproses en ‘n stank wat vlieë lok.

 

• - Kyk hoe vinnig hulle die groente verwerk, en voer hulle daarvolgens. ‘n Lys van kos waarvan hulle hou, is op my blog (adres verskyn onder-aan die artikel)

 

• - Een maal ‘n maand gaan ek met skoon hande in en werk die dinge effe deurmekaar. Net sodat die verwerkte inhoud nie kompakteer nie. Dit is ongelooflik hoeveel wurm eiers, babatjies en reuse wurms te vind is in die bin na ‘n tyd.

 

• - Vat versigtig aan die wurms, moenie bang wees nie, die laaste ou wat opgevreet is deur ‘n erdwurm, se Hollywood fliek het nie eens die silwerdoek gemaak nie – dit is sommer reguit video rak toe! Gril bietjie, haal asem, en vat aan jou diere. Touch Therapy in Progress…

 

• - ‘Wurm tee’ verskyn nie oornag nie. Dit word stelselmatig bodem toe gestuur met die ontbinding en verwerking van die bin inhoud en uitskeidings van die wurms. Ook die nutriënte van die groente en vrugte wat in die bin lê en kompos word, se sappe kom uiteindelik in jou onderste bin te lande. My eerste voggies het eers na 3 maande geland! Moenie ongeduldig raak nie.

 

• - Soos die wurms die beddegoed deurmekaar woel en laat opbreek, kan jy nog koerant en bietjies grond byvoeg om die organiese proses gelukkig te hou en die wurms werk te gee.

 

• - Hulle klouter soms teen die kante uit – ek tel hulle versigtig met ‘n tandestokkie op en gooi hulle terug op die beddegoed. Een maal ‘n week kyk ek vir verdwaaldes in die onderste bin. Ek sorg dat daar so ‘n repie koerant in die ‘vang bin’ is indien ‘n wurm wanderlust gekry het, en tydverdryf soek.

 

• - Ek stuur elke keer wanneer ek iets in ‘n pot vestig of ontkiem, ‘n wurm of 5 ‘met vakansie’. Hulle kry die geleentheid om buite die bin hulle taak te verrig, en wanneer die plant klaar gedra of geblom het, of uitgeplant word, is dit terug bin toe met die wurms (en enige nuwelinge)

 

• - ‘Wurm tee’ is geweldig ryk aan voedingstowwe. Gooi die vloeistof af, en voeg water by. 2 Dele water, teenoor een deel wurm tee. Maak jou huisplante of troetelplante daarmee nat. Die resultate is duidelik sigbaar na ‘n ruk.